ﺃﻛﺘﺮ ١٠ ﺣﺎﺟﺎﺕ ﻣﺠﻨﻨﺎﻧﻲ ﻓﻲ ﻣﺮﺍﺗﻲ..
١- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺯﻧﺎﻧﺔ ﺯﻥ ﺃﺳﻄﻮﻝ ﻣﻦ ﺫٌﺑﺎﺏ ﻣﻘﻄﻊ ﺑﻄﺎﻗﺘﻪ. ﺍﻟﺰﻥ ﻋﻨﺪﻫﺎ ﻓﻦ ﻭﻟﻴﻪ ﺃﺻﻮﻝ ﻭﺗﻜﺘﻴﻜﺎﺕ ﻭﺧﻄﻂ. ﺍﻟﺰﻧّﺎﻧﺔ ﻟﻤﺎ ﺑﺘﺸﺘﻐﻞ ﺑﻴﺒﻘﻲ ﻳﻮﻡ ﺻﻌﺐ ﻓﻌﻼ.
ﺑﺲ ﺧﻠﻴﻚ ﺻﺮﻳﺢ ﻣﻊ ﻧﻔﺴﻚ، ﺇﺣﻨﺎ ﺍﻟﺮﺟﺎﻟﻪ ﻟﻮ ﻣﺎﻓﻴﺶ ﺣﺪ ﺑﻴﺰﻥ ﻋﻠﻴﻨﺎ ﻣﺶ ﻫﻨﻌﻤﻞ ﺃﻱ ﺣﺎﺟﺔ ﻓﻲ ﺣﻴﺎﺗﻨﺎ. ﺇﺗﻌﻮﺩﺕ ﻋﻠﻲ ﺯﻥ ﻣﺮﺍﺗﻲ، ﻭﺑﻘﻲ ﺑﻴﻀﺤﻜﻨﻲ.. ﺧﺼﻮﺻﺎ ﻟﻤﺎ ﺗﺤﺐ ﺗﻌﻤﻞ ﺧﺒﻴﺜﺔ ﻭﻫﻲ ﺑﺘﺰﻥ !
٢- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺍﻟﻤﻨﻄﻖ ﻋﻨﺪﻫﺎ ﻛﺎﺋﻦ ﺧﺮﺍﻓﻲ ﻟﻘﻴﻂ ﻣﺠﻬﻮﻝ ﺍﻷﺏ ﻭﺍﻷﻡ ﻭﻋﻤﺮﻫﺎ ﻣﺎ ﺳﻤﻌﺖ ﻋﻨﻪ. ﺑﺘﺘﻐﺎﻅ ﻣﻨﻲ ﺟﺪﺍ ﻟﻤﺎ ﺑﺤﺎﻭﻝ ﺃﺭﺗﺐ ﺍﻓﻜﺎﺭﻧﺎ ﻭ ﺃﻭﻟﻮﻳﺎﺗﻨﺎ ﺃﻭ ﺍﻏﻠﻂ ﻭﺍﻗﻮﻟﻬﺎ ﻛﻼﻣﻚ ﻣﺶ ﻣﻨﻄﻘﻲ.
ﺑﺲ ﻣﻴﻦ ﻗﺎﻝ ﺇﻥ ﺍﻟﻤﻨﻄﻖ ﻟﻮﺣﺪﻩ ﻳﻨﻔﻊ؟ ﻣﻦ ﻏﻴﺮ ﺍﻟﺠﻨﺎﻥ ﻭﺍﻟﺘﺨﺒﻴﻂ ﻭﺍﻻﻓﻜﺎﺭ ﺍﻟﻤﺮﻳﺒﺔ ﺇﺣﺘﻤﺎﻝ ﻛﺒﻴﺮ ﻧﺘﺤﻮﻝ ﻟﻤﺠﻤﻮﻋﺔ ﻣﻦ ﺍﻟﺮﻭﺑﻮﺗﺎﺕ. ﺑﻘﻴﺖ ﺑﺤﺐ ﺃﺧﺪ ﺭﺃﻳﻬﺎ ﺍﻟﻠﻲ ﻣﺶ ﺑﺲ ﺧﺎﺭﺝ ﺍﻟﺼﻨﺪﻭﻕ، ﺩﻩ ﺧﺎﺭﺝ ﺣﺪﻭﺩ ﺩﺭﺏ ﺍﻟﺘﺒﺎﻧﺔ.
٣- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺭﻏﺎﻳﺔ ﺭﻏﻲ ﺍﻟﺴﻨﻴﻦ. ﻛﻤﻴﺔ ﺍﻟﺘﻔﺎﺻﻴﻞ ﺍﻟﻠﻲ ﺑﺘﻘﺪﺭ ﺗﺤﺘﻔﻆ ﺑﻴﻬﺎ ﺗﺨﺒﻞ. ﻟﻤﺎ ﺑﻐﻠﻂ ﻭﺑﺴﺄﻟﻬﺎ "ﻳﻮﻣﻚ ﻛﺎﻥ ﻋﺎﻣﻞ ﺇﺯﺍﻱ" ﺑﻘﺎﺑﻞ ﺗﺴﻮﻧﺎﻣﻲ ﻣﺮﻋﺐ ﻣﻦ ﺍﻟﺘﻔﺎﺻﻴﻞ ﺍﻟﺼﻐﻴﺮﺓ (ﺍﻟﺼﻐﻴﺮﺓ ﺃﻭﻱ ﺍﻟﺤﻘﻴﻘﺔ) ﻟﻜﻞ ﺣﺎﺟﺔ ﺣﺼﻠﺖ ﺍﻭ ﻛﺎﻧﺖ ﻣﻤﻜﻦ ﺗﺤﺼﻞ.
ﻗﺎﺭﻥ ﺩﻩ ﺑﻴﺎ ﻭﺍﻧﺎ ﺑﻌﺼﺮ ﺩﻣﺎﻏﻲ ﻋﺸﺎﻥ ﺍﻓﺘﻜﺮ ﻫﻮ ﺍﻟﻌﺸﺮ ﺳﺎﻋﺎﺕ ﺍﻟﻠﻲ ﻓﺎﺗﻮ ﺣﺼﻞ ﻓﻴﻬﻢ ﺍﻳﻪ ﻣﻦ ﺍﺳﺎﺳﻪ. ﻟﻮ ﻫﻲ ﻛﻤﺎﻥ ﻣﺶ ﺑﺘﺤﻔﻆ ﺗﻔﺎﺻﻴﻞ ﺍﻟﺘﻔﺎﺻﻴﻞ ﻛﻨﺎ ﻫﻨﺨﺴﺮ ﺿﺤﻚ ﻭﺗﺮﻳﻘﺔ ﻭﺍﺳﺘﻤﺘﺎﻉ ﻛﺘﻴﺮ.
٤- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺑﺘﺤﺐ ﺍﻟﻤﺴﻠﺴﻼﺕ ﺍﻟﻠﻲ ﺑﺘﻘﻌﺪ ١٥ ﺳﻨﺔ ﺩﻱ ﻭﻛﻞ ﺣﻠﻘﺔ ﺗﺘﻨﻬﻲ ﺑﻮﺍﺣﺪﺓ ﺳﺖ ﺑﺘﻌﻴﻂ ﺍﻭ ﺑﺘﺒﺮﻕ ﻟﻠﻜﺎﻣﻴﺮﺍ ﻭﺑﺘﺨﻄﻂ ﻟﻼﻧﺘﻘﺎﻡ ﻣﻦ ﺣﺪ ﻣﺎ.
ﺇﺗﻌﻠﻤﺖ ﺃﻻﻗﻲ ﺣﺎﺟﺔ ﻣﺸﺘﺮﻛﺔ ﻧﺘﻔﺮﺝ ﻋﻠﻴﻬﺎ ﺳﻮﺍ ﻣﻦ ﻏﻴﺮ ﻣﺎ ﺃﺗﺸﻞ (ﺯﻱ ﺣﺮﻳﻢ ﺍﻟﺴﻠﻄﺎﻥ ﻣﺜﻼ) ﻭﺑﻘﻴﺖ ﺑﻨﺒﺴﻂ ﻣﻦ ﺗﺄﺛﺮﻫﺎ ﻭﺗﺤﻠﻴﻠﻬﺎ ﻭﺗﻌﺎﻃﻔﻬﺎ ﻣﻊ ﻫﻮﻳﺎﻡ، ﻭﻓﻴﺮﻭﺯﻩ ﻭﺯﻋﻔﺮﺍﻧﺔ.
٥- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺑﺘﺤﺐ ﺍﻟﻠﺒﺲ، ﻓﻲ ﻋﻼﻗﺔ ﻏﺮﺍﻣﻴﺔ ﻋﻨﻴﻔﺔ ﻣﻊ ﺍﻟﺸﻨﻂ، ﻭﻣﻤﻜﻦ ﺗﻘﻒ ﺗﻜﻠﻢ ﺟﺰﻣﺔ ﻓﻲ ﻓﺎﺗﺮﻳﻨﺔ ﻭﺗﻘﻮﻟﻬﺎ ﺍﻧﺘﻲ ﺇﺯﺍﻱ ﺣﻠﻮﺓ ﻛﺪﻩ. ﻫﻨﺪﺧﻞ ﺍﻟﺴﺠﻦ ﻗﺮﻳﺐ ﺑﺴﺒﺐ ﺍﻟﺸﻮﺑﻴﻨﺞ ﺍﻧﺎ ﻣﺘﺄﻛﺪ.
ﺑﺲ ﺃﻧﺎ ﻗﺒﻞ ﻣﺎ ﺃﻋﺮﻑ ﻣﺮﺍﺗﻲ ﻛﻨﺖ ﺑﻠﺒﺲ ﻓﻀﻼﺕ (ﺯﺑﺎﻟﻪ ﻳﻌﻨﻲ). ﺃﻱ ﺣﺎﺟﺔ ﻛﻮﻳﺴﻪ ﺑﻠﺒﺴﻬﺎ ﺑﻴﺒﻘﻲ ﻓﻀﻞ ﻣﻨﻬﺎ، ﻭﺍﻱ ﺣﺎﺟﺔ ﺗﺎﻧﻴﺔ ﺑﻴﺒﻘﻲ ﻋﻤﻲ ﺍﻟﻮﺍﻥ ﻣﻨﻲ.
٦- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺑﺘﺤﺐ ﺍﻟﺨﺮﻭﺝ ﻭﺍﻟﺴﻔﺮ ﻭﺍﻟﺴﻬﺮ. ﻋﻨﺪﻫﺎ ﺍﻟﻘﺪﺭﺓ ﻋﻠﻲ ﺇﻋﺎﺩﺓ ﺷﺤﻦ ﺍﻟﺒﻄﺎﺭﻳﺎﺕ ﻣﻦ ﺻﻔﺮ ﻝ ١٠٠٪ ﻓﻲ ﺍﻗﻞ ﻣﻦ ٣ ﺛﻮﺍﻧﻲ. ﻣﻤﻜﻦ ﻧﻄﺒﻖ ﺍﺳﺒﻮﻉ ﻛﺎﻣﻞ ﻓﻲ ﺍﻟﺸﺎﺭﻉ ﻟﻮ ﻫﻲ ﻣﺒﺴﻮﻃﺔ (ﺍﺳﻜﻨﺪﺭﻳﺔ ﺍﻭ ﻟﻨﺪﻥ ﻣﺜﻼ).
ﻛﻞ ﻣﺎ ﺍﻓﺘﻜﺮ ﺫﻛﺮﻱ ﻟﻤﻜﺎﻥ ﺯﻭﺭﻧﺎﻩ ﺳﻮﺍ ﻭﺍﻧﺎ ﻧﺺ ﻧﺎﻳﻢ ﻭﺑﺤﻠﻢ ﺑﺎﻟﺴﺮﻳﺮ، ﻭﻗﺪ ﺍﻳﻪ ﺍﻧﺒﺴﻄﻨﺎ ﻓﻴﻪ، ﺍﺩﻋﻴﻠﻬﺎ ﻓﻲ ﺳﺮﻱ. ﺍﺗﻌﻠﻤﺖ ﺍﺛﻖ ﺗﻤﺎﻣﺎ ﻓﻲ ﺣﻜﻤﻬﺎ ﻭﺗﺮﺗﻴﺒﻬﺎ ﻟﻠﺨﺮﻭﺟﺎﺕ ﻭﺍﻟﺴﻔﺮ.
٧- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﺑﺘﺤﺐ ﺍﻟﻌﺎﺋﻠﺔ ﻭﺍﻟﻠﻤﻪ ﻭﺍﻟﺰﺣﻤﺔ ﻭﺍﻟﺪﻭﺷﺔ. ﺩﺍﻳﻤﺎ ﺑﻨﺒﺪﺃ ﺍﻧﻨﺎ ﻫﻨﺨﺮﺝ ﺳﻮﺍ ﺍﻟﻨﻬﺎﺭﺩﻩ، ﻭﻧﻨﺘﻬﻲ ﺑﺎﻟﻌﺎﺋﻠﻪ ﻭﺍﻻﺻﺤﺎﺏ ﻭﺍﻷﺣﺒﺎﺏ ﻭﺃﺣﺒﺎﺏ ﺍﻷﺣﺒﺎﺏ ﺧﺎﺭﺟﻴﻦ ﻣﻌﺎﻧﺎ.
ﻟﻮﻻﻫﺎ ﻛﻨﺎ ﻫﻨﻔﺘﻘﺪ ﺍﻭﻗﺎﺕ ﻋﻈﻴﻤﺔ ﻭﺫﻛﺮﻳﺎﺕ ﻋﺒﻘﺮﻳﺔ ﻭﺍﺭﺗﺒﺎﻁ ﺷﺪﻳﺪ ﺑﻜﻞ ﻓﺮﺩ ﻣﻦ ﺩﺍﻳﺮﺓ ﺍﻟﻨﺎﺱ ﺍﻟﻠﻲ ﺣﻮﺍﻟﻴﻨﺎ ﻣﻦ ﺍﻫﻞ ﻭﺍﺻﺤﺎﺏ. ﺑﻘﻴﺖ ﺍﺳﺘﻤﺘﻊ ﺑﻤﻜﺎﻟﻤﺔ ﺍﻟﺘﻠﻴﻔﻮﻥ ﺍﻟﻠﻲ ﺑﺘﺘﺨﺎﻧﻖ ﻓﻴﻬﺎ ﻣﻊ ﻛﻞ ﺍﻟﻨﺎﺱ ﻋﺸﺎﻥ ﻳﻠﺒﺴﻮﺍ ﻭﻳﺴﺘﻌﺪﻭﺍ ﻟﻠﻨﺰﻭﻝ ﻓﻲ ﺧﻼﻝ ١٠ ﺩﻗﺎﺋﻖ ﻭﺇﻻ ﻫﺘﻮﻟﻊ ﻓﻴﻬﻢ ﻛﻠﻬﻢ.
٨- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﻗﻠﻘﺎﻧﺔ ﻣﻦ ﻛﻞ ﺣﺎﺟﺔ ﺣﺼﻠﺖ ﺍﻭ ﺑﺘﺤﺼﻞ ﺍﻭ ﻣﻤﻜﻦ ﺗﺤﺼﻞ ﺑﻌﺪ ﺯﻭﺭﺑﻴﺢ ﺳﻨﺔ. ﺍﻻﺭﺽ ﻣﺎﻟﺖ ﻓﻲ ﺍﺧﺮ ﺍﻟﻒ ﺳﻨﻪ ﺑﻤﻌﺪﻝ ﺻﻔﺮ ﻓﻲ ﺍﻟﻤﻴﻪ ﻣﺜﻼ؟! ﻳﺎ ﻧﻬﺎﺭ ﺍﺳﻮﺩ، ﺍﺯﺍﻱ؟ ﻫﻨﻌﻤﻞ ﺍﻳﻪ ﻓﻲ ﺍﻟﻤﺼﻴﺒﺔ ﺩﻱ؟ ﻣﺤﺘﺎﺟﻴﻦ ﻧﺮﻭﺡ ﻣﺘﺮﻭ ﻋﺸﺎﻥ ﻧﺠﻴﺐ ﺯﻳﺖ ﺍﻟﺰﻳﺘﻮﻥ ﺍﻟﻨﺎﻗﺺ ﻋﻨﺪﻧﺎ ﺣﺎﻻ. ﺣﺎﻻ.
ﺍﻧﺎ ﺑﺎﻟﻨﺴﺒﺔ ﻟﻴﻬﺎ ﺗﻼﺟﺔ ١٨ ﻗﺪﻡ ﺑﺘﺘﻜﻠﻢ ﻭﺑﺘﺎﻛﻞ ﻭﺑﺘﻨﺎﻡ. ﺍﺗﻌﻮﺩﺕ ﺍﻓﻬﻢ ﻗﻠﻘﻬﺎ ﻭﺍﺣﺘﺮﻣﻪ. ﺍﻭﻗﺎﺕ ﻛﺘﻴﺮ ﻗﻠﻘﻬﺎ ﺍﻟﺰﻳﺎﺩﻩ ﺑﻴﺤﻤﻴﻨﺎ ﻣﻦ ﻣﺼﺎﻳﺐ ﺳﻮﺩﺍ.
٩- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﻣﺸﺎﻋﺮﻫﺎ ﻧﺎﺯﻟﺔ ﺣﺠﻢ ﻋﺎﺋﻠﻲ. ﻣﻤﻜﻦ ﻳﻮﻣﻬﺎ ﻳﺒﻮﻅ ﻋﺸﺎﻥ ﺧﺒﺮ ﺣﺪ ﻣﺎﺕ ﻓﻲ ﻧﻴﻮﺯﻟﻨﺪﺍ ﺑﺴﺒﺐ ﻣﺮﺽ ﻏﺎﻣﺾ ﻭﺍﺗﻌﺬﺏ ﺷﻮﻳﺔ.
ﺍﻧﺎ ﺑﻘﻲ ﻳﻮﻣﻲ ﻣﺴﺘﺤﻴﻞ ﻳﺒﻮﻅ ﻟﻮ ﺍﻧﺎ ﺷﺨﺼﻴﺎ ﺍﻟﻠﻲ ﻣٌﺖ ﺑﺎﻟﻤﺮﺽ ﺍﻟﻐﺎﻣﺾ ﺩﻩ. ﺍﺗﻌﻮﺩﺕ ﺍﺣﺘﺮﻡ ﻭﺍﺗﻌﺎﻣﻞ ﻣﻊ ﺯﻟﺰﺍﻝ ﺍﻟﻤﺸﺎﻋﺮ ﺍﻟﻠﻲ ﺑﺘﺘﻐﻴﺮ ﻛﻞ ﺧﻤﺲ ﺩﻗﺎﻳﻖ.. ﺩﻱ ﻃﺒﻴﻌﻪ ﻭﺧﻠﻖ.
١٠- ﻣﺮﺍﺗﻲ (ﺯﻱ ﻛﻞ ﺍﻟﺴﺘﺎﺕ) ﻟﻤﺎ ﺑﺎﻧﺸﻐﻞ ﻋﻨﻬﺎ ﻷﻱ ﺳﺒﺐ، ﺍﻭ ﺗﺤﺲ ﺇﻧﻲ ﻣﺶ ﻣﻬﺘﻢ ﻛﻔﺎﻳﻪ، ﺑﺘﺴﺘﺪﻋﻲ ﻛﻞ ﻋﻔﺎﺭﻳﺖ ﺍﻻﺭﺽ ﻋﺸﺎﻥ ﻳﻨﺴﻮﻫﺎ ﻛﻞ ﺣﺎﺟﺔ ﺣﻠﻮﺓ ﺃﻧﺎ ﻋﻤﻠﺘﻬﺎ ﻣﻌﺎﻫﺎ ﻣﻦ ﻳﻮﻡ ﻣﺎ ﺍﺗﻌﺮﻓﻨﺎ.. ﻭﻳﻔﻜﺮﻭﻫﺎ ﺑﻘﺪ ﺍﻳﻪ ﺍﻧﺎ ﻧﺪﻝ ﻋﺪﻳﻢ ﺍﻻﺣﺴﺎﺱ ﻭﻣﺼﺎﺹ ﺩﻣﺎﺀ ﻫﻲ ﻣﺶ ﻣﺼﺪﻗﻪ ﺍﺗﺠﻮﺯﺗﻪ ﺍﺯﺍﻱ ﻭﻟﻴﻪ.
ﻓﻲ ﺍﻭﻝ ﺟﻮﺍﺯﻧﺎ ﻛﻨﺖ ﺑﺘﺸﻞ ﻣﻦ ﺍﻟﺤﺮﻛﺔ ﺩﻱ ﻭﺑﻔﻘﺪ ﺍﻋﺼﺎﺑﻲ.. ﺩﻟﻮﺃﺗﻲ ﺑﺎﺧﺪ ﺑﺎﻟﻲ.. ﻭﺍﺗﻌﻠﻤﺖ ﺍﻥ ﺍﻫﺘﻤﺎﻣﻬﺎ ﺑﻌﻼﻗﺘﻨﺎ ﻭﺑﺎﻟﺒﻴﺖ ﺃﺿﻌﺎﻑ ﺃﺿﻌﺎﻑ ﺗﻔﻜﻴﺮﻧﺎ ﺍﻟﻌﻤﻠﻲ ﺍﻟﻤﻨﻄﻘﻲ ﺍﻟﻤﺎﺩﻱ ﺍﻟﻤﺤﺪﻭﺩ. ﺇﻫﺘﻤﺎﻣﻬﺎ ﻋﻨﻴﻒ ﻭﺃﻧﺎﻧﻲ ﻭﻣﺎﺑﻴﻘﺒﻠﺶ ﺍﻟﻘﺴﻤﺔ ﻋﻠﻲ ﺇﺗﻨﻴﻦ ﺃﺑﺪﺍ.
ﺍﻟﻌﺸﺮ ﻧﻘﻂ ﺍﻟﻠﻲ ﻓﺎﺗﻮ ﺩﻭﻝ ﻫﻤﺎ ﺍﻟﺴﺒﺐ ﺍﻧﻬﺎ ﺍﺻﻞ ﺍﻟﺒﻴﺖ ﻭﺍﺳﺎﺳﻪ ﻭﻋﺼﺐ ﺍﻟﺤﻴﺎﻩ ﻓﻴﻪ..
ﺍﻟﻌﺸﺮ ﻧﻘﻂ ﺩﻭﻝ ﻫﻤﺎ ﺍﻟﺴﺒﺐ ﺍﻧﻬﺎ ﺃﻣﻲ ﻭﺑﻨﺘﻲ ﻭﺻﺎﺣﺒﺘﻲ ﻭﻣﺪﻳﺮﺓ ﺃﻋﻤﺎﻟﻲ ﻭﺳﻜﺮﺗﻴﺮﺗﻲ ﻭﺭﺋﻴﺲ ﻣﺠﻠﺲ ﺍﺩﺍﺭﺓ ﺑﻴﺘﻨﺎ ﺍﻟﺼﻐﻴﺮ.
ﺩﻭﻝ ﺃﻛﺘﺮ ١٠ ﺣﺎﺟﺎﺕ ﻣﺠﻨﻨﺎﻧﻲ ﻓﻲ ﻣﺮﺍﺗﻲ.. ﻟﻜﻨﻲ ﻣﺴﺘﺤﻴﻞ ﺍﺳﺘﻐﻨﻲ ﻋﻦ ﻧﻘﻄﺔ ﻭﺍﺣﺪﻩ ﻣﻨﻬﻢ ﻗﺪﺍﻡ ﺍﻟﺪﻧﻴﺎ ﺑﺎﻟﻠﻲ ﻓﻴﻬﺎ.
ل رامي كامل
ليست هناك تعليقات:
إرسال تعليق
ياريت تعليقاتكم ياجماعة