سمك فيليه على الطريقة الصينية

النهارده هنعمل مع بعض طبق السمك الفيليه على الطريقة الصينية، لكل الناس اللي بتحب الأكل الصيني؛ يلّا بينا على المطبخ نشوف هنعمله إزاي…
سمك فيليه على الطريقة الصينية 
المقادير:

• كيلو سمك فيليه
• عصير 3 ليمونات
• ملح وفلفل أسود
• ملعقة كبيرة زبدة
• ملعقة صغيرة كمون
• 4 فصوص ثوم مفرومين
• ملعقة كبيرة بهارات سمك (هتلاقيها عند العطار)
• أوراق كزبرة خضراء “للتزيين”
• ليمونة مقطّعة شرائح “للتزيين”

الطريقة:
1- تبّلي السمك في بهارات السمك لمدة نصف ساعة.

2- بعد كده سيّحي الزبدة على نار هادية، وضيفي معاها الثوم المفروم والملح والفلفل والكمون، وقلّبيهم كلهم مع بعض لمدة 5 دقائق.

3- ضيفي عليهم السمك، وقلّبيهم مع بعض لمدة 5 دقائق كمان أو لغاية ما تلاقي إن السمك لونه بقى دهبي.

4- ضيفي عليهم عصير الليمون، وسيبيهم مع بعض على النار لمدة 3 دقائق، وبعد كده ارفعي الطاسة من على النار، واغرفي السمك في طبق التقديم، وزيّنيه بأوراق الكزبرة وشرائح الليمون.. وبألف هنا وشفا.

وبكده تكون خلصت وصفتنا النهارده..
ماتنسوش بعد ما تجرّبوها تبعتوا تقولوا لنا على النتيجة..