يوم الجمعة

يوم الجمعة ده بعتبره يوم العائلة يعنى اجازة وفرصة الواحد يقعد فيه مع مراته وعياله بعد اسبوع من اﻷنشغال عنهم كدة ونفطر مع بعض بدل ماكل واحد بياخد فطاره ويجرى على مدرسته او شغله نقعد بقى نفطر على ترابيزة واحدة وكان زمان فيه حاجة اسمها طبلية واوعى تقول ياأأاى طبلية دى بلدى ارد واقولك ايوة دى بلدى مصر دى جزء مميز لتراثنا وهويتنا الثقافية ولو انت مصر تبقى الا فرنكا يعنى على نسق الفرنجة يعنى الفرنساويين احب اقولك ان كلمة طبلية جاية من table وهى كلمة فرنساوى معناها ترابيزة وصدقنى مش مهم انت قاعد على كرسى ولا قاعد على الارض المهم انت احساسك ايه وانت قاعد حاسس بالدفا العائلى ومبسوط ولا عمال تلعن اليوم اللى اتجوزت فيه انت مصدر احساسك باﻷشياء وبالوجود، انا ليا واحد زميلى فى الشغل بيعرف يستمتع بمفردات الحياة مهما كانت بساطتها مرة لقيته فرحان سألته انت فرحان اوى يا استاذ جابر وباين عليك فالى ايوة اصلنا طابخين عدس طبعا انا هرشت فى دماغى وقلت فى سرى ايه الحلو فى كدة ده مجرد عدس لكن بدات افهم الconcept لما بدا يوصفلى لمته مع عياله وازاى بيستمتع باكل العدس مع البصل وسط عياله ساعتها عرفت انى انا اللى مش فاهم وانه فعلا اذا غرف السبب بطل العجب نرجع تانى ليوم الجمعة ياسلام بقى لو كان الفطار فول وطعمية وبطاطس محمرة وبصل وكفاية بقى طول الاسبوع جبن الى انت معجبلى بيها والى ممكن تعمل معاك شغل مش تمام يوم الخميس بالليل لانها مليانة استروجين يامعلم ده بقى لو مراتك بتصحى بدرى وتجهز اللمة مش زى مراتى اللى بتصحى بعد الساعة 12 وتكروتنا بكام ساندوتش جبنة على مربي وكل واحد على انفراد ولو صحيت لقيتها رابطة دماعها يبقى نصيحتى ليك يامعلم انسي كل اللى قولتهولك وخد ديلك فى سنانك ويافكيك على اقرب قهوة ولا روح اترزع فى النادى او اتكوم فوق السرير لابنطلونك يتبل من مية المسح لو لابسة المنديل يبقى ده يوم تنظيف او فيه ماتش غسيل فيه ستات كدة تنقى اليوم اللى الراجل قاعد فيه علشان تنضف الشقة ويرجعوا يقولولك رجالة عيونهم فارغة عاوزين يتجوزوا ليه يوم الجمعة اقعد وسط اهلك وعيالك واتكلموا حاول تنقلهم خبراتك وافكارك وتتواصل معاهم ومافيش مانع تقعد تلاعبهم جيمز على الكومبيوتر وترجع عيل تانى بلا مسؤلي وياريت لو تقدر تاخدهم وتخرجهم وياسلام لو تزور قرايبك بدل التكنولوجيا اللى فرقتنا وخلت كل واحد لازقلى سماعة بلوتوث جنب قفاه ولا قاعدلى طول الليل فى الضلمة على الكومبيوتر زى الخفاش وبلاش تناقش مشاكل البيت مع مراتك يومها وبلاش تشرب سجاير علشان صحتك وصدر مراتك والعيال ياريت نخلى يوم الجمعة يوم العائلة نقعد مع بعض نتواصل بدل مابنتقابل بالصدفة فى الصالة واحنا كل واحد منا نازل شغله او مدرسته.